Эл агартуунун отличниги Бүбүкан Жусупованын бул эмгеги жашоонун билимине негизделип өзүн-өзү тааныйын, жашоосун өзгөртөйүн деген адамдарга багыт берет. Мындагы нарк-нускалуу насааттар жан дүйнөнү өзгөртүү, ойду таза кармоо, сөздү туура сүйлөө, мамилени баалоо, көңүлдү бийик тутуу жана башка ушул сыяктуу адам жашоосуна эң керектүү болгон билимдерди камтыйт. Негизги булак катары ата-бабаларыбыздан калган мурас сөздөр жана "Бакдөөлөт" коомунун "Жашоо сабагы" аттуу окууларындагы маалыматтар, ошондой эле "Бакдөөлөт", "Ак нур", "Тууралык", "Акыйкат", "Негиз","Тумар", "Аталардан келген мурас" деген китептеринен алынган акыл саптары пайдаланылды.

китептен үзүндү.

.....................................

Тилек.

Адам таза, жакшы ойлорду багып, жакшы тилектерди тилеп алдыга умтулса, адашуулары аз болот. “Жакшы тилек -жарым ырыс, ак  бата толук ырыс” деген улуу сөз бар. Жакшы тилек адамга тирек болуп, чоң кубат берип турат. Ал кубат  адамга  канат болуп, дайыма алгалатып турат. Ал үчүн тилек айтууда ар бир сөздү талдап, тандап так, таамай айтыш керек. Тилектеги ар бир сөз туура нукта айтылса, адамга кубат берет, ошондой эле жашоонун нурун таанытат.

Тилек тилегенде сарсанаада, коркунуч сезимде болбой, көңүлдүн токтугун, тынчтыгын карманып, башка нерсеге көңүлдү алаксытпай чын жүрөктөн тиленсе – ошол тилек күчтүү болот. Тилекти жан дүйнөдөн, көкүрөктүн тереңинен тилениш керек. Адамдын тилеги кубатсыз болсо, орунсуз болсо, ал тилек ааламга жетпейт, кубат ала албайт, демек, мындан улам иш жүзүнө ашпайт. Ошондуктан, тилек күчтүү, кубаттуу болушу зарыл. Кубаты алсыз адам өтө узак мөөнөттө тиленип жүрүп тилегине жетет. Кубаттуу, демдүү адамдын тилеги күчтүү болот, андай адамдын тилеги бат эле орундалат. Тилекти тилеп жатканда адамда терең ишеним болуш керек. Адам нааразычылыкта болбой, “Кудай тилегимди угуп жатат, мага жардам берет” деген терең ишенимде туруш керек. Эгерде адам тилегин бага билсе, дайыма ошол тилекти ойлоп, башка нерсеге бурбаса, тилегин кудай орундатканга шарт түзүп берет. Адам бир нерсени тилеп, анан башка тилекке ооп кетсе, биринчи тилеги болбой калышы мүмкүн экен. Адамдын тилеги, ою бир нукта болгону оң. Тилекти бир күндө бир эле жолу айтып койбостон, күнүнө бир нече жолу чын дили менен кайталап турса, орундалышына жакшы мүмкүнчүлүк берет.....