Америка Психологдор Ассоциациясы тарабынан креативдүү, таланттуу жана жөндөмдүү балдарды окутуп үйрөтүүдө колдонууга сунушталган психологиянын негизги 20 принциби иштелип чыккан. Кыргыз балдарынын чыныгы потенциалын ачып, туура багыттоо менен өлкөбүздүн өнүгүүсүнө жана элибиздин бакубат жашоосуна салым кошуу максатында бул эмгек англис тилинен которулду. Бул принциптер – чыгаан психологдордун изилдөөлөрүнө таянып, көптөгөн талкуу, талдоо жана тандоолордун натыйжасында келип чыккан эмгек.
Окуучулар кандай ойлонушат жана кантип үйрөнүшөт? Окуучуларды эмнелер шыктандырат? Эмне себептен социалдык чөйрө, жеке инсандык мамилелер жана эмоционалдык тең салмактуулук окуучулардын билим алуусу үчүн маанилүү? Класс кантип натыйжалуу башкарылат? Окуучунун жетишкендиктери кантип бааланат? Балага сабактан канча баа алдың деп сураган туурабы же эмне үйрөндүң деген туурабы? ж.б.у.с суроолордун жообун таба аласыздар.
Аталган эмгек буга чейин англисчеден чехче, эстончо, французча, корейче, кытайча,португалча, испанча, серпче, түркчө, арапча жана словенчеге которулган. Бул эмгекти англисчеден кыргызчага Элмира Абжапарова жана Бакытбек Абдуллаев которуп, редакторлугун Асылбек Жоодонбеков, корректорлугун Жетиген Асанбек аркалады. Ал эми И.Арабаев атындагы КМУнун окуу иштер боюнча проректору, психол.и.к, проф.м.а Тууганбай Коңурбаев жана КББАнын ага илимий кызматкери, п.и.к. Гүлайым Жумабаева рецензиялады.
Китептин кыргызча котормосу Кыргыз билим берүү академиясынын окумуштуулар кеңеши тарабынан жактырылган. Бул методикалык колдонмо педагогика тармагында окуган студенттер, мугалимдер, психологдор, тарбиячылар, ата-энелер, билим берүү тармагында иш алып барган адистер жана жалпы окурмандарга сунушталат.