Качандыр бир жаралам деп ойлоном,

Бул чеги жок табийгаттын колунан.

Аалам кези айланыштуу жол менен,

Мен жашоого кайра баштап жолугам...

Аз, бирок нускалуу өмүр сүргөн акындын бул китебинде эң мыкты чыгармалары топтоштурулду. Китеп окурмандарды кайдыгер калтырбайт деген ойдобуз

Издейм сени арасынан элдердин,
Бактарынан бардык кооз жерлердин.
Сен ааламга издетүүгө жаралсаң,
Мен ааламга издөө үчүн келгенмин.

Акпы, көкпү же сарыбы жоолугуң,
Жоолугуңдун түсүн билбей оорумун.
Күзгө калган жалбырактын өңүндөй,
Ажарынан азууда ден соолугум.

Тиктейм сени тизмегинен элдердин,
Гүлзарынан күндөй кооз жерлердин.
Сен ааламга кыйноо үчүн жаралсаң,
Мен түбөлүк кыйналууга келгенмин.

Кызыл бекен, пушту бекен көйнөгүң,
Мынча оңой алоолонтуп ойнодуң.
Мүмкүн ушул зор бактынын өзүдүр,
Өмүр бою бир көрүнбөй койгонуң.