Асыл ойлор  (Рубаилер ). төртүнчү басылышы, автору Качкыналы Сыдыгалиев.

Рубаи төрт сап ыр. бул жанр чыгыш элдеринин классикалык поэзиясында кеңири орун алган. ал кыска болгону менен окурмандардынга терең философиялык ой калтырат. Белгилей кетчү нерсе, төрт саптан турган ар кандай ыр рубаи боло бербейт, ал үчүн жалпылаштырган философиялык ойдун болушу зарыл.

Автордон: Мен окурмандарга сунуш кылган рубаи китеп ааламга аты чыккан белгилүү илимпоз, акын Омар Хайямды туурагандыкка жатпайт. Жогоруда айтылгандай ар кимдин өз оюу, өз жолу тагдыры бар. Мен да чубалган көчкө кошулуп, көп менен аралашып келатам. Максатым кыргыз элинин кылымдап келаткан ата салтын, адеп ахлагын, акыл сөзүн, ыйман ырыскерлигин рубаи жанры аркылуу окурмандарга жеткирип, ойуна ортоктош болуу.

  Рубаи жанрынын үстүндө эмгектенгенде, турмуштун көрүнгөн-көрүнбөгөн татаал суроолоруна жооп издөөдө, жаратылыштын жандуу агымынан, доордун топураган калың катмарына, тумандаган турмуштун арасынан асыл ойду издеп таап элге тартуулаш мен үчүн сыймык, чексиз бакыт.

Рубаи башка ырга окшоп шыдыр окуганды жактырбайт. Рубаи токтоп, ойлонуп окушту талап кылат. Жаңыртылган жаңы рубаи китеп окурмандарды кайдыгер калтырбай кызыгуусун арттырарга ишеним чоң....

китептен үзүндү:

1064

Бул дүнүйө турса дагы болуп жарык,

Ууруга кең дүйнө турат тарып.

Калп айтып кутулам деп ойлобогун,

Чындыкка такаласың акыр барып.

1984

Сүйүү кумар, кумарланып ойнойсуң.

Канча болсо, сен сүйүүгө тойбойсуң.

Өмүр бою жаштык мезгил турса деп,

Атаганат айрым кезде ойлойсуң

2590

Ыйласаң да, туйласаң да өмүр өтөт,

Жамандыкты жакшылы кууп өтөт.

Бир сөздү кайталаса кайра -кайра,

Ал сөздүн соолуган гүлдөй баркы кетет.

2707

Аял сүйсө куштар кылат эркекти,

Кошо ичет арак менен шербетти.

Акырында ичкиликке алдырып,

Бырыш басат бетиндеги берметти.

2711

Тарта ич деп айласыздан айтылат сөз,

Такыр ичпе дейт элем көзмө-көз.

Ичкен үйдө ишенип кой тынчтык жок,

Ичсең ташта, болсо сенде акыл-эс.

3106

Адамга абийир деген өтө керек,

Көрбөйт деп ууру кылба, Кудай көрөт.

Тирүүңдө колго түшпөй аман калсаң,

Өлгөндө сазайыңды Кудай берет.