Кыргыздар жөнүндө көптөгөн тарыхий маалыматтар, санжыра, мурас, салт, рухий маданият, элдик билимдер жөнүндө жана башка кызыктуу маалыматтар  камтылган 20 томдон турган китептер жыйнагы сиздин назарыңызда. Түзгөндөр  Кеңеш Жусупов, Каныбек Иманалиев

Аталган китептин авторлору – Кыргыз эл жазуучусу Кеңеш Жусупов менен Жогорку Кеңештин депутаты Каныбек Иманалиев. Бул китепке кыргыз элинин байыркы доорлордон тартып азыркы күндөргө чейинки бай тарыхы, үрп-адат, каада-салттары, санжыралары топтолгон.

Тарыхчы-окумуштуулардын айтымында бул эмгек кыргыз элинин уңгулуу баалуулуктарын, ата мурасын, тарыхый эс тутумун өзүнө камтып турган энциклопедиялык эмгек болуптур. Чынында эле «Кыргыздар» китеби кийинки муундар үчүн баа жеткис байлык, өзүнчө жаткан кенч.

Каныбек Иманалиев эң байыркы тарыхы бар, улуу элдерден экенибизди айтып мактаналы дедик дейт. Автордун айтымында дүйнөдө алтындан жасалган 3 бет кап табылган болсо, Кыргызстандан табылган бет кап комузчунун сөөгүнүн жанынан табылган. Мындан миң жыл мурун кыргыздар менен чектеш жашаган 14 улуттун ичинен кыргыздар кана элдүүлүгүн сактап, өз алдынча мамлекет болуп калган. Калган улуттар жиксиз жок болуп кетишкен.Эгер мындан 1,5 миң жыл мурун 20 улуттун жазуусу болгон болсо, анын бири кыргыздар болгон. Мына ушундай уникалдуу тарыхы бар кыргыз элинин ар замандагы маалыматтары ушул китепке киргизилген. Депутат Каныбек Иманалиевдин айтканына караганда бул китепте 300дөн ашык тарыхчылардын, санжырачылардын, элдик авторлордун эмгектери орун алган.